B a r ð a k l ú b b u r i n n

Vefsíða Barðaklúbbsins
Vefur þessi er stofnaður í maí 2000 og lýsir starfsemi klúbbsins

[ Aðalsíða ] [ Barðabikarinn ] [ Pósthús ] [ Albúmið ] [ Fyrri starfsár ]

Skákmeistari Barðaklúbbsins 2003

Björn Ólafsson
er bikarhafi 2003

Myndir frá lokaumferð
og fleiri viðburðum eru í
Albúminu

Úrslit móta og staðan

Hér er staðan uppfærð jafnóðum að afloknu hverju móti. Til þess að skoða útreikninga er hægt að smella á töfluna og fara í "lifandi töflu" sem býður upp á að skoða gildi bak við útreiknaðar tölur o.þ.h. Ekki er víst að allir vefskoðarar (browsers) ráði við töfluna og því er hún höfð á sér síðu.

Neðan við töfluna eru úrslit einstakra móta starfsársins sýnd. Allar töflur hér á síðunni eru í formi GIF-mynda.

Lokastaðan 2002-2003

Excel-skrá


Mót 37	03 05 27
Teflt var á Skúlaskeiði í þessari lokaumferð starfsársins. Fyrir umferðina var aðeins sjónarmunur á þeim Birni og Jörundi, Birni nægðu jafnmargir vinningar og Jörundur fengi til að verða bikarhafi, en Jörundur þurfti vinning umfram Björn ef hann átti að verja meistaratitil sinn frá síðasta ári. Fljótlega kom í ljós að Björn tefldi af meira öryggi og fór svo að hann hafði tryggt sér meistaratitil Barðaklúbbsins fyrir lokaumferðina þegar hann mætti Jörundi. Björn er því réttkrýndur meistari starfsársins 2002-2003. Eggert mætti í fyrsta skiptið á starfsárinu og lagði sitt af mörkum til að halda aftur af Birni, en það kom ekki að sök fyrir verðandi meistara klúbbsins.


Mót 36	03 05 20
Teflt var við Hamarskotslæk. Edda og Sigurbjörn buðu til móts að þessu sinni og var ánægjulegt að koma á gamlar slóðir og heiðra með því minningu Björns heitins Lárussonar. Eins og við var að búast var heldur lítið viðnám klúbbfélaga gegn taflmennsku Sigurbjörns, það var þó Hannes sem gerði sér lítið fyrir og hélt uppi merki klúbbsins með eina heila vinningnum sem tekinn var af Sigurbirni. Björn náði ekki að styrkja heildarhlutfall sitt og dró því aðeins úr þeim mun sem er á honum og Jörundi í hinni afar jöfnu baráttu þeirra um bikarinn. Úrslitarimma er því fyrirsjáanleg á milli þeirra í lokamótinu næsta þriðjudag.


Mót 35	03 05 13
Teflt var í Aragötu. Meðan Halldór er í óða önn í stjórnarmyndunarviðræðum að reyna staðfesta flokk sinn sem B-deild í Sjálfstæðisflokknum voru okkar turnarnir tveir, Björn og Jörundur, eitthvað miður sín og náðu ekki árangri í samræmi við væntingar. Jörundur tefldi reyndar aðeins seinni umferðina. Adolf tefldi hins vegar vel og vann góðan og verðskuldugan sigur.


Mót 34	03 05 06
Teflt var við Bugðulæk á þessu síðasta móti kjörtímabilsins. Magnús vann með góðu skori enda að ná sér upp úr pólitísku þunglyndi, reynandi að sætta sig við það sem í stefnir með áframhaldandi íhaldsstjórn næstu fjögur árin. Nokkuð skorti á kraftinn í Birni frá síðustu mótum og gaf hann Jörundi færi á að minnka prósentubilið sem á milli þeirra er í keppni þeirra um bikarinn, nú skilja aðeins 2-3 skákir þá að Birni í vil.


Mót 33	03 04 29
Teflt var í Háaleiti. Björn hélt uppteknum hætti og sigraði, greinilega staðráðinn í því að hreppa bikarinn að þessu sinni.


Mót 32	03 04 22
Teflt var á Skúlaskeiði. Í nokkuð þéttum toppi urði Björn og Bjarni Ólafsson efstir og styrkti Björn sig örlítið gagnvaty Jörundi í keppninni um bikarinn. Jörundur var þó aðeins einum vinningi á eftir sigurvegurunum þannig að ekki breikkaði bilið mikið. Á milli þeirra í þessum þétta toppi var Barði, aðeins hálfum á eftir efstu mönnum. Rögnvaldur hefur greinilega ekki teflt neitt í vetur og reið ekki feitum hesti í þessu fyrsta mótiu sínu að þessu sinni.


Mót 31	03 04 15
Teflt var í Blönduhlíð. Eins og svo oft áður vann Björn mótið. Góður félagi og fulltrúi klúbbsins af Austurlandi, Sigurður Arnarson, tefldi með að þessu sinni og færði mönnum tíðindi úr sínum heimahögum. Þar eru allir fullir bjartsýni og ótal ný karlastörf eru óðum að verða til á svæðinu. Komur munu víst fá í auknu mæli það hlutverk í uppganginum öllum að þurrka af, ekki mun af veita, eða svo tjáði Siggi okkur sunnanmönnum.


Mót 30	03 04 08
Teflt var í Sólheimum. Með góðum sigri Björns og óvenju slakri frammistöðu Jörundar að þessu sinni gerðist það að Björn fór upp fyrir Jörund í vinningshlutfalli vetrarins og er nú með 69,22% á móti 68,85% Jörundar. Spennan á toppnum er því orðin harla mikil. Magnús varð í öðru sæti, hálfum vinningi á eftir Birni líkt og síðast, en þess má til gamans geta að Magnús hefur unnið flestar skákir í vetur, eða alls 232 skákir. Jörundur tefldi aðeins aðra umferðina og það er spurning hvort glæsileg frammistaða hans undanfarið í briddskeppnum sé að koma honum í koll í skákinni í síðustu mótum. Það verður fróðlegt að sjá hvort Jörundi tekst að hrista af sér skákslenið í þeim mótum sem eftir eru vetrar.


Mót 29	03 04 01
Teflt í Lynghaga. Björn vann mótið eftir harða keppni þar sem þeir Magnús og síðan Bjarni fylgdu fast á eftir. Björn saxar óðum á forskot Jörundar í stöðu vetrarins, Jörundur er nú með hlutfallið 69,65% en Björn stendur í 68,84%. Jörundur hefur í síðustu mótum fallið niður fyrir 70% í fyrsta sinn í vetur sem gerir það að verkum að spenna færist í leikinn.


Mót 28	03 03 25
Teflt var við Bugðulæk. Jörundur tefldi af öryggi og vann sannfærandi. Þeir Barði og Bjarni Ól skiptu með sér öðru og þriðja sæti.


Mót 27	03 03 18
Teflt var í Grænukinn. Þrír urðu efstir og jafnir að þessu sinni, Barði, Jörundur og Björn, þannig að breidd var allmikil í toppinum, en hinir þrír fengu þá að sjálfsögðu færri vinninga.


Mót 26	03 03 11
Teflt var að Háaleiti. Góðir gestir mættu á staðinn, þeir Egill og Jón Þorvarðarson. Magnús tefldi með bestum árangri að þessu sinni og vann nokkuð örugglega.


Mót 25	03 03 04
Teflt var í Blönduhlíð. Barði bauð upp á ómældar veitingar Stefáni og öðrum til mikillar gleði, en heldur var illa mætt svo færri nutu kaffis og meðlætis en skyldi. Magnús náði skori sem helst minnti á Björn og vann sitt 6. mót.


Mót 24	03 02 25
Teflt var í Sólheimum. Mæting var óþarflega slök, en þeir toppmenn, Jörundur og Björn, deildu með sér efsta sæti. Mótið hreyfði því lítið við innbyrðis stöðu þeirra á töflu vetrarins.


Mót 23	03 02 18
Teflt var í Lynghaga. Húsráðandi Björn tefldi af ólýsanlegum krafti og vann mótið með tæplega 90% vinningshlutfalli. Reyndar fylgdi Magnús honum fast eftir en lenti vinningi undir eftir tap í síðustu umferð. Vaxandi spenna. Björn hefur saxað heilmikið á það forskot sem Jörundur hefur haft á þessu starfsári og með þessum síðustu úrslitum hefur Björn færst upp í 69,07% vinningshlutfall á meðan Jörundur sígur aðeins, eða í 70,58%. Það munar því ekki nema u.þ.b. 1,5 prósentustigi á þeim eins og staðan er núna.


Mót 22	03 02 11
Teflt var á Skúlaskeiði. Að þessu sinni vann Magnús mótið. Nokkur forföll voru þetta kvöld og báðu menn þess að forseti klúbbsins væri nú ekki lagstur í vínsmökkun með fínu fólki á nýjan leik - eins fánýt iðja og það nú þykir. Vonandi kann hann haldbetri skýringar en þessar næstkomandi þriðjudag, en þá munu menn mæta í Lynghagann.


Mót 21	03 02 04
Teflt var við Bugðulæk. Ólafur Hannesson mætti eins og síðast á Bugðulæknum og vann mótið af nokkru öryggi. Magnús og Jörundur fylgdu honum þó þétt eftir en það dugði ekki til. Suðurnesjamaðurinn Sigurður H Jónsson var með í fyrsta sinni á þessu starfsári og þótti mönnum ágætt að sjá hann aftur.


Mót 20	03 01 28
Teflt var í Grænutungu. Sjálfur Barði lét sig vanta í þetta mót og var reyndar óvenju fáliðað þetta kvöld. Jörundur kom ekki á óvart með sigri sínum, hann hlaut 9,5 vinninga af 12 sem telst allgott eða öllu heldur fullgott.


Mót 19	03 01 21
Teflt var að Háaleiti. Gestgjafinn Jörundur endurtók leikinn frá því síðast og marði sigur í mótinu hálfum vinningi fyrir ofan næsta mann sem var Magnús að þessu sinni.


Mót 18	03 01 14
Teflt var í Sólheimum. Jörundur tefldi vel að vanda og tryggði sér sigurinn, en Bjarni Ól og síðan Magnús komu þétt á hæla hans.


Mót 17	03 01 07
Teflt var að Bugðulæk. Hannes tók á móti klúbbfélögum í nýjum húsakynnum á nýju ári. Hann tefldi fram leynivopninu syni sínum. Bragðið tókst og Ólafur Hannesson vann mótið, þó ekki nema með hálfum vinningi umfram Barða. Barði hefur greinilega snúið dæminu við frá því sem var í síðasta móti síðasta árs þegar hann barðist við að hanga inni á töflunni.


Mót 16	02 12 17
Teflt í Blönduhlíð. Jörundur kom, sá og sigraði. Björn var bitlausari en oftast áður þetta kvöld og Barði var hreint út sagt óþekkjanlegur í taflmennsku sinni. Þetta var síðasta mót ársins, til næsta móts á nýju ári verður boðað af forseta með dagskrá.


Mót 15	02 12 10
Teflt var að Hraðastöðum. Adolf tefldi vel og vann mótið, en Björn og Bjarni Ólafsson komu fast á hæla hans. Hinir voru nokkuð langt að baki þessum þremur efstu. Hannes framdi sitt fyrsta skróp þetta starfsárið þannig að Stefán hefur nú jafnað hann í ástundun.


Mót 14	02 12 03
Teflt var á Aragötu. Björn vann glæsilega líkt og síðast. Aðrir urðu langt á eftir honum. Jörundur tefldi í fyrri hluta mótsins með ekki síðri árangri en Björn svo keppni hefði geta orðið mikil milli þeirra ef Jörundur hefði geta teflt í síðari umferðinni. Magnús tefldi aðeins í síðari umferðinni.


Mót 13	02 11 26
Teflt var norðanvert við Hellisgerði. Björn barðist um á hæl og hnakka og vann, hlaut 12,5 vinninga af 15 mögulegum. Magnús fékk einum vinningi minna og aðrir voru talsvert þar á eftir.


Mót 12	02 11 19
Teflt var í Grænukinn. Björn mun hafa verið í útlöndum á kostnað skattborgara eftir því sem upplýstingar fengust um og Jörundur var einnig fjarri góðu gamni en án viðurkenndrar afsökunar. Jón Gunnar stóð sig best og vann með 70% hlutfalli. Bjarni kom fast á hæla hans og aðrir þar á eftir.


Mót 11	02 11 12
Teflt var við Hraunbraut. Björn og Magnús tefldu báðir vel og hlutu 11 vinninga af 14 mögulegum og deildu með sér efstu sætum. Nokkur umræða var um prófkjör helgarinnar og var húsráðanda Margréti óskað til hamingju með árangur sinn á þeim vettvangi. Minnugir aðferðanna í Norð-Vestur kjördæmi héldu menn aftur af sér við skákborðið og reyndu ekki að hafa í frammi mikil brögð í tafli.


Mót 10	02 11 05
Teflt var við Háaleiti. Nokkur forföll voru þessu sinni. Til tíðinda bar að Jörundur bókstaflega gaf engan grið og vann með yfir 90% vinningshlutfalli. Þótti af þessum ástæðum ýmsum nóg um gestrisnina á hans heimavelli þetta kvöld.


Mót 09	02 10 29
Teflt var í Sólheimum. Magnús byrjaði með fáeinum töpum en gaf síðan ekkert eftir og varð efstur með 75% vinningshlutfall. Jörundur kom á hæla hans, hálfum vinningi á eftir, og Björn lenti í 3ja sæti.


Mót 08	02 10 22
Teflt var við Bugðulæk. Jóni Gunnari var fagnað og náði hann næstum að vinna mótið, en Jörundur sá til þess að svo færi ekki og tók efsta sætið með 75% vinningshlutfall.


Mót 07	02 10 15
Teflt var að Hraðastöðum. Magnús og Jörundur unnu mótið með 10 vinningum af 14 mögulegum. Jörundur leiddi mótið þar til Magnús komst fram úr honum í næst síðustu umferð en staðan jafnaðist í þeirri síðustu.


Mót 06	02 10 08
Teflt var á Skúlaskeiði. Magnús tefldi af miklum móð á heimavellinum og stóð uppi sem sigurvegari með 73,3% vinningshlutfall. Þrír röðuðu sér í næsta sæti, þ.e. 2-4.


Mót 05	02 10 01
Teflt var að í Lynghaga. Björn tefldi af miklum móð á heimavellinum og stóð uppi sem sigurvegari með yfir 80% vinningshlutfall. Svona vel að merkja, þá er það svo sem ekki nýtt háttarlag hjá honum.


Mót 04	02 09 24
Teflt var að í Blönduhlíð. Bjarni Ólafsson stóð sig hvað best að þessu sinni og vann mótið með rúmlega 70% vinningshlutfalli. Aðrir fengu minna.


Mót 03	02 09 17
Teflt var að Aragötu. Góður félagi, Smári, mætti að vestan og tók 3ja sætið. Í öðru sæti með 65.6% vinningahlutfall varð Jörundur. En það var Björn sem tók fyrsta sætið með trompi, fékk 81,3% vinningshlutfall.


Mót 02	02 09 10
Teflt var í Grænutungu. Óskar tefldi vel að vanda, eins og hann alltaf gerir þegar hann er staddur hér á landi. Karl faðir hans stoppaði hann þó vel af (þrátt fyrir allan barlóm um hvernig drengurinn væri búinn að leika hann grátt undanfarið) og það varð til þess að Jörundur náði að deila með honum efsta sæti eftir að þeir höfðu skilið jafnir í innbyrðis viðureignum.


Mót 01	02 09 03
Mótshald á nýju starfsári hófst í Hvassaleiti. Jörundur annaðist töflu og móststjórn í forföllum Barða, en auk hans var Stefáns einnig saknað. Hannes er kominn úr útlegðinni frá síðasta vetri og mætti að sjálfsögðu galvaskur. Magnúsi tókst að vinna þetta fyrsta mót starfsársins.