Barðabikarinn

Um Barðabikarinn hefur verið teflt frá árinu 1988. Bikarinn er með hefðbundnu lagi og er nafn hans grafið með áberandi hætti á framhliðina. Bikarinn stendur á stöpli úr rauðgulu marmaralíki og á stöpulinn eru festar litlar silfurplötur sem í eru greipt nöfn bikarhafa hvers árs. Bikarinn var framlag Björns heitins Lárussonar og Eggerts Lárussonar til klúbbsins á sínum tíma. Tilgangurinn með bikarnum er að skerpa baráttuvilja félagsmanna, gera keppni alla betur markvissa og árangur eftirsóknarverðan. Til þess vinna bikarinn þarf klúbbfélagi að vera með hæsta vinningahlutfall eftir starfsárið og hafa teflt að minnsta kosti 340 skákir eða tekið þátt í 25 mótum. Ekki er að efa að bikarinn hefur haft jákvæð áhrif á taflmennsku flestra klúbbfélaganna og gert keppni alla skemmtilegri.